Ferðaleiðaraskeið

Kundi tú hugsað tær at vita nógv um:

• uppruna & búseting í Føroyum
• Ólav kong & Nólsoyar Páll
• føroyska búskapin & livigrundarlagið
• sosiologi & matmentan
• jarðfrøði, plantufrøði og landbúnað
• list, burðardygd & ferðavinnu
• og førleikar at greiða frá og siga søgur?

So er ferðaleiðarskeiðið kanska nakað fyri teg.

Á Miðnámi í Vestmanna kanst tú lesa til ferðaleiðara.

Skeiðið tekur 1 ár og er sett saman av skeiðspørtum umframt endaligari verkætlan. Undirvísingin er skipað sum teoretisk og praktisk undirvísing í tilsamans umleið 200 undirvísingartímar. Tríggir fjórðingar er teoretisk undirvísing við fyrilestrum, floksundirvísing og bólkaarbeiði, meðan seinasti fjórðingurin er skipaður sum praktisk undirvísing við vitjanum, útferðum og venjingum.

Skeiðið byrjar í august og endar í mai/juni. Undirvísingin fer fram á Miðnámi í Vestmanna, eitt kvøld um vikuna, meðan útferðir og vitjanir verða skipaðar í vikuskiftum. Næmingar hava møtiskyldu, og skeiðið endar við verkætlan og próvtøku.

Nærri upplýsingar um skeiðið fáast við at venda sær til Maud Poulsen, maud.poulsen@skulin.fo ella á tlf. 27 04 78.

Treytin fyri upptøku er, at umsøkjari er fyltur 21 ár og hevur staðið gymnasialt miðnám ella aðra viðkomandi útbúgving.

Umsøkjarin skal hava fastan bústað í Føroyum og hava góðan málsligan førleika í føroyskum, og einum ella fleiri fremmandamálum á í minsta lagi á B-stigi í gymnasialu miðnámsskipanini. Fremmandamál eru onnur mál enn tey skandinavisku málini, td. enskt, týskt og spanskt. Í ávísum føri kann umsøkjari tó verða tikin inn við grundarlagi í eini upptøkusamrøðu.

Skeiðskostnaðurin er kr. 6.000, sum skal rindast, áðrenn skeiðið byrjar.

Lýst verður á miv.fo og í miðlunum, tá ið til ber at søkja um upptøku til næsta skeið.

Nærri upplýsingar um skeiðið fáast við at venda sær til Maud Poulsen, maud.poulsen@skulin.fo ella á tlf. 27 04 78.

Skeiðslýsing og námsskipan